ኢተምድ የ2013 በጀት ዓመት የመጀመሪያ ሩብ ዓመት አፈፃፀሙን ገመገመ

ኢተምድ በ2013 በጀት ዓመት የመጀመሪያ ሩብ ዓመት 4‚324 አገልግሎቶች በላብራቶር፣ በውጪና አገር ውስጥ ምርት ኢንስፔክሽንና በሠርተፊኬሽን አገልግሎቶች እንዲሁም በጁቡቲ ወደብ በኩል የኢንስፔክሽን ስራ 294,300 ሜትሪክ ቶን የስንዴ እና የአፈር ማዳበሪያ ኢንስፔክሽን አገልግሎቶች በመስጠት ጥራት ያለው ምርትና አገልግሎት እንዲኖር እና በጥራት ላይ የተመሰረተ ፍትሃዊ የግብይት ስርዓት እንዲኖር ከሌሎች ባለድርሻ አካላት ጋር በመቀናጀት የበኩሉን ድርሻ እየተወጣ ይገኛል፡፡

አረንጓዴ  አሻራ    

በኢትዮጵያ የደን ኃብት ስነ-ምሕዳር ከግብርናው ክፍለ ኢኮኖሚ ጋር ቀጥተኛ ትስስር አለው፡፡  ብርቅዬ የአገሪቱ የዱር አራዊትና አዕዋፍት፣ እንሰሳት እንዲሁም ደኑ የአካባቢውን ስነ-ምሕዳር ሚዛን በመጠበቅ ረገድ የራሱን ከፍተኛ አስተዋፅኦ ያበረክታል። ባለፉት ዓመታት የሀገሪቱ የደን ቦታዎች ለእርሻና መኖሪያነት ለመሳሰሉ አገልግሎቶች በመፈለጋቸው የደኑ ሽፋን በፈጣን ሁኔታ በመራቆት ላይ ይገኛል።   የደን ሀብትን ማልማት የአየር ንብረትለውጥ እያደረሰ ያለውን አሉታዊ ተፅዕኖ ለመቋቋም ትልቅ ሚና የሚጫወት በመሆኑና በሀገራችን በከፍተኛ ደረጃ በደን መመናመን ምክንያት እየተከሰተ ያለውን አካባቢያዊ፣ማህበራዊና ኢኮኖሚያዊ ችግሮችን ለመግታት  ዘላቂ የደን ልማትና  ጥበቃ ወሳኝ ሚና አለው፡፡

ኢተምድና ግብርና ሚ/ር የአነስተኛ የውሃ መሳቢያ ፓምፖችና ሞተሮች ፍተሻ ማዕከል አቋቋሙ

ግብርና የኢኮኖሚያቸው የጀርባ አጥንት ለሆኑ ሀገራት የዘርፉን ምርታማነት ለማሳደግ እንደግብዓት ከሚጠቀሙባቸው መሳሪያዎች መካከል የውሃ ፓምፕ ይገኝበታል፡፡ በሀገር ውስጥ የሚገኙ የውሃ ፓምፖችን በተመለከተ የግብርና ትራንስፎርሜሽን ኤጀንሲ ባካሄደው ጥናት በአገር ውስጥ ጥቅም ላይ እየዋሉ የሚገኙት አብዛኞቹ ፓምፖች የጥራት ጉድለት ይታይባቸዋል፡፡ ይህንን የጥናት ግኝት ታሳቢ በማድረግ ለወደፊቱ የፓምፖችን ጥራት ለማረጋገጥ ደረጃ እንዲዘጋጅለትና ትግበራውም አስገዳጅ እንዲሆን ለማድረግ ኢተምድ፣ግብርና ሚኒስቴር እና ሌሎች የጉዳዩ ባለቤት የሆኑአስር መስሪያ ቤቶችን ያሳተፈ የስራ ቡድን በማዋቀር ደረጃው የተዘጋጀ ሲሆን፤ደረጃዎቹ እንዲተገበሩ እና የታዩ ችግሮች መፍትሄ እንዲያገኙ የአጭር እና የረጅም ጊዜ እቅድ በማዘጋጀት ወደ ትግበራው ተገብቷል፡፡

ኢተምድ የ2012 በጀት የመጀመሪያ ሩብ ዓመት የስራ አፈፃፀሙን ገመገመ፡፡

ጥቅምት 05/2012ዓ.ም ኢተምድ ከሰራተኞቹ ጋር በጋራ የ2012 በጀት ዓመት የመጀመሪያ ሩብ ዓመት የእቅድ አፈፃፀምን ገምግሟል፡፡ በግምገማው ወቅት ድርጅቱየውስጥ አቅሙን በማጠናከር ከጊዜ ወደ ጊዜ እራሱን እየፈተሸ አሰራሩን በማሻሻል የላቀ እናተመራጭ የተስማሚነት ምዘና አገልግሎት ሰጪ ድርጅት መሆንን ቁልፍ ተግባር አድርጐ በፍተሻ ላቦራቶር፣በኢንስፔክሽንና በሰርቲፊኬሽን አገልግሎቶች በዓለም አቀፍ አሰራር መሰረት አገልግሎት በመስጠት ለሀገር ኢኮኖሚ እድገት የበኩሉን ድርሻ እየተወጣ እንደሚገኝ የተገለፀ ሲሆን  በሩብ ዓመቱም በሦስቱም የስራ ዘርፎች በድምሩ ለ4‚593 የአገልግሎት ጥያቄዎች አገልግሎት መስጠት መቻሉን ተገልፆል፡፡ በዚሁ መድረክ ላይ የ2011 በጀት ዓመት የሰራተኞች የስራ አፈፃፀም ምዘና መሰረት በማድረግ ግንባር ቀደም እና ሞዴል ሰራተኞች የገንዘብ፣ የደረጃ እድገት እና የእውቅና ምስክር ወረቀት ተበርክቷላቸዋል፡፡

የኢተምድ የ2011 በጀት ዓመት የስራ ክንውን

የኢትዮጵያ የተስማሚነት ምዘና ድርጅት የውስጥ አቅሙን በማጠናከር የተሰጠውን አገራዊ ተልዕኮ በሚመጥን ደረጃ እራሱን ለማብቃት እና ኢኮኖሚያዊ እና ማህበራዊ ሚናውን በተገቢው መልኩ ለመወጣት እንዲችል ከጊዜ ወደ ጊዜ አሰራሩን እየፈተሸ እራሱን እያሻሻለ ይገኛል፡፡ ለዚህም ባለፉት ዓመታት ተቋሙን ያጋጠሙ ክፍተቶችን በመቅረፍ፣መልካም ተሞክሮዎችን በማጠናከር ድርጅቱ ያስቀመጠውን ራዕይ ለማሳካት የጀመረው እንቅስቃሴ ውጤታማ ሊያደርገው የሚችል መሆኑን የተቋሙ እቅድ አፈፃፀም አመልካች ነው፡፡

የኢትዮጵያ የተስማሚነት ምዘና ድርጅት በ2011 በጀት ዓመት ውስጥ 24‚170 የተለያዩ የአገልግሎት ጥያቄዎችን በመቀበል በሶስት የአገልግሎት ዘርፎች የጥራት ማረጋገጫ አገልግሎቶችን ሰጥቷል፡፡ ይህም 15‚541 የፍተሻ ላብራቶር አገልግሎት፣7‚603 የኢንስፔክሽን አገልግሎት እና 1‚026 የሰርቲፊኬሽን አገልግሎት ይገኝበታል፡፡ የበጀት ዓመቱ አፈፃፀም ከ2010ዓ.ም ተመሣሣይ ወቅት ጋር ሲነፃፀር የ36% ብልጫ ያሣያል፡፡

አገልሎቶቹም ሲዘረዘሩ፡ በፍተሻ ላቦራቶር፡ በኬሚካል 2‚326፣ በሜካኒካል 8‚646 ፣ በማይክሮ ባዮሎጂ 870 ፣ በኤሌክትሪካል 1‚278 ፣ በጨርቃ ጨርቅና ቆዳ 605 እና በጨረራ ላቦራቶር 1‚816  በጠቅላላ ለ15,541 የተለያዩ የምርት አይነት ወካይ ናሙናዎች የጥራት ፍተሻ ላቦራቶር አገልግሎት በመስጠት ምርቶቹ የወጣላቸውን የጥራት መስፈርት ያሟሉ መሆናቸውን  ወይም አለመሆናቸውን ማረጋገጥ ተችሏል ፡፡

በኢንስፔክሽን፡ ለ6‚563 የተለያዩ የወጪ የምርት ዓይነቶች፣ ለ997 የተለያዩ የአገር ውስጥ ምርቶች፣ ለ15 መርከብ ከውጭ ለሚመጣ ስንዴ እና 28 መርከብ ከውጭ ለሚመጣ የአፈር ማዳበሪያ በድምሩ ለ7‚603 የኢንስፔክሽን አገልግሎት ጥያቄዎች የጥራት ኢንስፔክሽን አገልግሎት በመስጠት ጥራት ያለው ምርትና አገልግሎት እንዲኖር ድርጅቱ የበኩሉን አስተዋፅኦ አበርክቷል፡፡